بەھۆی لێچوون و دزەکردنی غازەوە، ژن و پیاوێكی بەساڵاچوو لە ماڵەكەی خۆیاندا لە كەركوك گیانیان لەدەستدا.
رووداوەكە بەرەبەیانی ئەمڕۆ پێنجشەممە لە گەڕەکی “ئەسرا و مەفقودین”ـی شاری کەرکوک روویداوە، پیاوەكە ناوی نەوزاد عەبدولکەریمە و تەمەنی 73 ساڵە، هاوژینەكەشی ناوی سوعاد کەریمە كە تەمەنی 71 ساڵە.
موقەدەم – عامر نوری وتەبێژی پۆلیسی كەركوك بە ئێستای راگەیاند، لە لێكۆڵینەوەی سەرەتاییدا دەركەوتووە ژن و پیاوەكە بەهۆی لێچوونی غازەوە خنکاون، بەڵام تەرمەكانیان گواستراونەتەوە بۆ پزیشكیی دادی و لێكۆڵینەوە لە رووداوەكە بەردەوامە.
رووداوەكانی مردن بەهۆی لێچوونی غازەوە لە هەرێمی كوردستان و ناوچەكانی دەرەوەی ئیدارەی هەرێم ساڵانە چەندین جار روودەدەن، زۆرترینیان زستانی رابردوو بوو كە دەیان هاوڵاتی بەهۆی لێچوونی غاز و لێكەوتەكانییەوە گیانیان لەدەستدا.
