قوباد تاڵەبانی بەبۆنەی جەژنی چوارشەممە سووری ئێزدییەکانەوە پەیامێکی پیرۆزبایی بڵاوکردەوە، رایگەیاندووە، سەرباری ئەو کارەساتە گەورانەی بەسەریاندا هاتووە بەڵام ئێزدییەکان پارێزگارییان لە ئایین و کوردبوونی خۆیان کردووە.
لە پەیامەکەی قوباد تاڵەبانیدا وێڕای پیرۆزبایی لە کوردانی ئێزدی بەبۆنەی جەژنی چوارشەممە سوورەوە، جەختدەکاتەوە کە ئێزدییەکان پێکهاتەیەکی رەسەنی کوردستانن.
ئاماژە بەوەدەکات، “ئێزدییەکان سەرباری ئەوەی لە مێژوودا گەلێک ناخۆشی و کارەساتی گەورەیان بەسەرداهاتووە، بەڵام پێداگرییان لەسەر شوناسی خۆیان کردووە و ئایینەکەیان و کوردبوونی خۆیان پاراستووە”.
راشیگەیاندووە، “کوردستان شانازی بە هەموو پێکهاتەکانی خۆیەوە دەکات و پێویستە بە هەموو لایەکیشمانەوە هەوڵ بدەین کلتوری پێکەوەژیان کە رەگێکی قووڵی لە مێژووماندا هەیە بەهێزتر بکەین”.
