سەعد کەمبەش سەرۆکی پێشووی دیوانی وەقفی سوننەی عێراق لە زیندانی کەڕادە هەڵات، بەوهۆیەوە بڕیاری دەستبەسەرکردنی ئەفسەرانی بنکەی پۆلیسی ساڵحیە و کەڕادە درا.
شەوی رابردوو سەعد کەمبەش سەرۆکی پێشووی دیوانی وەقفی سوننەی عێراق لە زیندانی کەڕادە لە بنکەی پۆلیسی ساڵحیە هەڵات کە بەهۆی گەندەڵییەوە دەستگیرکرابوو.
سەعد کەمبەش سزای چوار ساڵ زیندانیکردنی بەسەردا سەپێنرابوو.
دوای هەڵاتنی سەرۆکی پێشووی دیوانی وەقفی سوننەی عێراق، راوێژکاری مستەفا کازمی رایگەیاند، بڕیاری جددی و رێکاری توند لەوبارەیەوە دەگرنەبەر.
هەروەها عەبدولئەمیر شەمەری، وەزیری ناوخۆی عێراق رایگەیاند، سەرجەم ئەفسەر و پۆلیسەکانی زیندانی کەڕادە دەستگیردەکرێن و لیژنەیەکیش بۆ لێکۆڵینەوە لە هەڵاتنی کەمبەش دروستدەکرێت.
