ئێوارەی ئەمڕۆ هەینی 18ی كانونی یەكەم، ڕوداوێكی كوشتن لە ناحیەی قەرەهەنجیر سەر بە پارێزگای كەركوك ڕویدا.
بە گوێرەی زانیارییەكانی “تۆڕی میدیایی ئێستا” بكوژان و كوژراوەكە برای یەكدین و دانیشتووی گوندی (سوورەدێ)ی سەر بە ناحیەی قەرەهەنجیر-ن و ڕوداوەكە لە ماڵی خۆیاندا ڕویداوە، سەرەتا شەڕ و دەمەقاڵێ لەنێوانیاندا دروستبووە، دواتر بكوژەكان كە سۆران فەخرەدین محەمەد و یوسف فەخرەدین محەمەد-ن، براكەی خۆیان بە ناوی نەجمەدین فەخرەدین محەمەد لەدایكبووی 1979ی كوشتووە و هەڵهاتوون.
لە لێدوانێكدا بۆ “تۆڕی میدیایی ئێستا” ڕائید-عامر نوری، وتەبێژی پۆلیسی كەركوك هەواڵەكەی پشتڕاستكردەوە و ڕایگەیاند، “هۆكاری شەڕەكە تەنها ناكۆكیی نێوان سێ براكە بووە.”
وتیشی، “تەرمی كوژراوەكە گەیشتووەتە پزیشكیی دادوەریی كەركوك و گولە بەر سنگی كەوتووە.”
