ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، حكومەتی عێراق پێداچوونەوە بە سیستمی مووچە دەكات و كار بۆ ئەوە دەكات كە مووچەی مووچەخۆران زیادبكرێت و دەشڵێت، “ئەركی حكومەتی هەرێمە جێبەجێیبكات بە تایبەت كە لەمەوبەدوا عێراق نەوتی هەرێم دەفرۆشێت و بودجەی بۆ رەوانە دەكرێت و داهاتی لەبەردەستدا دەبێت”.
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، حكومەتی عێراق لیژنەیەكی پێكهێناوە بۆ پێداچوونەوە بە سیستمی مووچە و كار بۆ زیادكردن و رێكخستنەوەی سیستمی مووچە دەكات و وتیشی، “وەكو لیژنەی دارایی بانگێشتی ئەو لیژنەیەمان كردووە و كۆبوونەوەمان لەگەڵدا ئەنجامداون”.
راشیگەیاند، زیادكردنی مووچە لە دەسەڵاتی حكومەتی عێراقدا و دەیانەوێت ئەو نادادپەروەرییەی لە سیستمی مووچەدا هەیە چارەسەربكەن و وتیشی، “ئێستا كە هەناردەی نەوتی هەرێم لە رێگای سۆمۆوە دەبێت و بودجەی لە عێراقەوە بۆ رەوانە دەكرێت ئەركی حكومەتی هەرێمە هەر گۆڕانكارییەك لە سیستمی مووچە لە عێراق بكرێت لە هەرێمی كوردستانیش جێبەجێبكرێت، بەو پێیەی لە بەغدادەوە بودجەی بۆ رەوانە دەكرێت و نەوتەكەشی لە رێگای سۆمۆوە دەفرۆشرێت”.
