یانەی بایرن میونشن لە مێرکاتۆی هاوینی 2023 گۆڕانکاری دەکات و بڕیاردراوە هێرشبەرێکی سەرەڕم دابین بکات.
ڕۆژنامەی “بێلد سپۆرت” لەو بارەیەوە نووسیویەتی، سەرەڕای ئەوەی شارەزایانی وەک لۆتەر ماتیۆس و دیتمار هامان بە باشی دەزانن بایرن لە مێرکاتۆی هاوینەدا کۆلۆ موانیی فەرەنسی بکڕێت، بەڵام ئیدارەی یانە باڤارییەکە بە ئاراستەیەکی دیکە هەنگاودەنێت.
ئۆلیڤەر کان و حەسەن ساڵحەمیدزیچ چاویان بڕیوەتە تواناکانی ڤیکتۆر ئۆسیمینی هێرشبەری یانەی ناپۆلی، پێیانوایە باشترین جێگرەوەیە بۆ لیڤاندۆڤسکی لە کاتێکدا ئێریک چوپۆ مۆتینگ ئاستی بەپێی پێویست نەبووە و ئەوەش کاریگەری لەسەر ئاستی یانەکە لە خولی یانە پاڵەوانەکان و خولی ئەڵمانیا دروستکردووە، دوایین زیانیش کە بەهۆی نەبوونی هێرشبەری سەرەڕمەوە لێیانکەوتووە، بەرامبەر مانچستەر سیتی بووە لە قۆناغی چارەکی کۆتایی چامپیۆنزلیگ.
ئۆسیمین لەم وەرزەدا (29) یاری بۆ ناپۆلی لەسەرجەم خول و پاڵەوانێتییەکاندا کردووە، (25) گۆڵ و (5) ئەسیستی تۆمارکردووە.
هێرشبەرەکەی نایجیریا تاوەکو ئێستا گۆڵکاری خولی ئیتاڵیایە بە (21) گۆڵ، توانای یاریکردنی بە تۆپی بەرز و هێزی جەستەی هەیە، ئەوەش سەرنجی ئیدارەی بایرن میونشنی ڕاکێشاوە.
