ئیدارەی یانەی بەرشلۆنە هەوڵەکانی بە ئاراستەی لیۆ مێسی دەستپێکردووە، لە هەوڵیشدان لەڕێگەی سپۆنسەرانەوە تێچووی گواستنەوەکە دابین بکەن.
بەپێی زانیارییەکانی جێرارد ڕۆمێرۆی ڕۆژنامەنووسی ناودار و شارەزای بواری گواستنەوەکان، لە ئێستادا بەڕێوەبەرانی یانە کەتەلۆنییەکە سەرقاڵن بە دانوستاندن لەگەڵ چەند کۆمپانیایەکی جیهانی گەورە، ئەم هەنگاوەشیان لەپێناو بەدەستهێنانی پاڵپشتی دارایی و یاساییدایە بۆ واژۆکردنی گرێبەستێکی نوێ لەگەڵ لیۆ مێسی.
سەرچاوەیەکی نزیک بە ڕۆمێرۆی ڕاگەیاندووە، کە ناتوانێت زانیاریی ورد لەبارەی نزیکبوونەوەی ئیدارەی بارسا و مێسی ئاشکرا بکات، بەڵام ئەوەی دووپاتکردووەتەوە، کە نزیکبوونەوە ڕوویداوە و واژۆکردنی گرێبەستەکەش لەسەددا سەد مسۆگەر نییە.
مێسی لەم وەرزەدا بە درێسی پاریس سان جێرمانەوە (33) یاریکردووە، (18) گۆڵ و (17) ئەسیستی کردووە، هاوینی 2023 گرێبەستەکەی کۆتاییدێت و تاوەکو ئەم ساتە پاریس سان جێرمان سەرکەوتوو نەبووە لە نوێکردنەوەی.
