ئەو هاوڵاتییانەی كەمدەرامەتن، بیمەی تەندروستییان بۆ دەستەبەردەكرێت و خزمەتگوزاریی تەندروستییان بە خۆڕایی پێشكەشدەكرێت.
پڕۆژەكە وەزارەتی كار و كاروباری كۆمەڵایەتیی عێراق رایگەیاندووە و ئەحمەد ئەسەدی وەزیری كار دەڵێت، دەرگای ناونووسین بۆ بیمەی تەندروستی كراوەتەوە.
بەپێی راگەیەندراوێكی وەزارەتی كار و كاروباری كۆمەڵایەتی، ئەحمەد ئەسەدی وەزیری كار بڕیاریداوە بە كردنەوەی دەرگای ناونووسین بە شێوەی ئەلیكترۆنی بۆ خێزانە كەمدەرامەتەكان بە مەبەستی بەدەستهێنانی بیمەی تەندروستی.
پرۆسەی ناونووسینەكە لە ئەمڕۆ یەكشەممەوە دەستیپێكردووە و بۆ ماوەی شەش مانگ بەردەوامدەبێت، راگەیەندراوی وەزارەتەكە وای نووسیوە و ئاماژەی بۆ ئەوەش كردووە كە خێزانە سوودمەندبووەكان، خزمەتگوزارییە تەندروستییەكانیان بە بێبەرامبەر پێشكەشدەكرێن.
