سەرۆكی یەكێتی هاوخەمی بۆ كۆچی دوایی هاوژینی شەهید عەبدولڕەحمان قاسملوو دەردەبڕێت و دەڵێت، پشتیوان و دۆستێکی دڵسۆزی خەباتی گەلی کورد و مافەکانی بوو.
بافڵ جەلال تاڵەبانی، سەرۆكی یەكێتیی نیشتمانیی كوردستان لە پەیامێكدا رایگەیاند، ماتەمینی و هاوخەمی قووڵی خۆمان بۆ کۆچی دوایی خاتوو هێلین قاسملوو ناسراو بە نەسرین قاسملوو، هاوژینی شەهید دکتۆر عەبدولڕەحمان قاسملوو دەردەبڕین.
بافڵ جەلال تاڵەبانی دەشڵێت، “دکتۆر قاسملوو ناوێکی دیار و سەرکردەیەکی لەبیرنەکراوی مێژووی خەباتی کوردایەتییە. لە رووداوە سیاسییەکانی رۆژهەڵات و باشووری کوردستان رۆڵێکی بەرچاوی هەبوو و بە بیروباوەڕە شۆڕشگێڕی و دڵسۆزانەکەیەوە مێژوویەکی پڕ لە شانازی و سەروەری بۆ خۆی تۆمارکردووە”.
دووپاتیشیدەكاتەوە، خاتوو هێلینی هاوژینیشی پشتیوانێکی هەمیشەیی و دۆستێکی دڵسۆزی خەباتی گەلی کورد و مافە رەواکانی بوو.
سەرۆكی یەكێتی لە كۆتایشدا دەڵێت، رۆحی خاتوو هێلین قاسملوو شاد بێت و یاد و یادەوەری دکتۆر قاسملوو بۆ هەمیشە بەرزبێت.
هێلین قاسملوو کە لەناو حیزبی دیموکراتدا بە “خوشکە نەسرین” بەناوبانگ بوو دوێنێ هەینی لە تەمەنی 89 ساڵیدا و لە پاریسی پایتهختی فەرهنسا کۆچی دواییکرد.
