لە ئەگەری كۆبوونەوەی باراناو و دروستبوونی لافاودا هاتوچۆی سلێمانی رێنمایی دەداتە شۆفێران دەربارەی چۆنیەتی مامەڵەكردن لەگەڵ ئەو دۆخانە و داوای پابەندبوونیان لێدەكات.
بەڕێوەبەرایەتیی هاتوچۆی پارێزگای سلێمانی رایگەیاند، ناسەقامگیریی کەشوهەوا و بارینی بارانێکی زۆر وادەکات لە هەندێک لە شەقامەکان باراناو کۆببێتەوە و گریمانەی ئەوە دروستدەکات کە پەککەوتن بۆ ئۆتۆمبێلەكان بهێنێتە کایەوە.
داواش لە شۆفێران دەكات بۆ حاڵەتی زۆر پێویست نەبێت لەم کاتانەدا شۆفێری نەکرێت بەرەو ئاراستەی ناوشار و ناوچە شاخاوییەکان و رێگاوبانەکانی دەرەوەی شار تا ئەوکاتەی دۆخی کەشوهەوا ئاسایی دەبێتەوە.
هەروەك چەند رێنماییەكی دیاریكردووە و داوادەكات شۆفێران پابەندبن پێوەی:
1. ئەگەر بە شەقامێکدا شۆفێریت کرد و بینیت ئاستی باراناو بەرزە، خێرایی ئۆتۆمبێلەکەت کەمبکەرەوە بۆ ئەوەی ئەو باراناوە بەرەو ئاراستەی بزوێنەرەکە نەچێت و ببێتەهۆی کوژاندنەوە و پەککەوتنی بزوێنەرەکە.
2. ئەگەر لە شوێنێک هەستتکرد لافاو دروست بووە لەسەر ئەو شەقامە بەرەو ئاراستەی لافاوەکە مەڕۆ، چونکە لەمکاتانەدا زۆر بە ئاسانی ئەو لافاوە دەتوانێت سوارڕەوەکەت رابماڵێت و مەترسیی خنکاندن و کارەساتی بەدوابێت.
3. لە رێگاوبانەکانی دەرەوەی شار، پێویستە شۆفێران بە خێراییەکی گونجاو و لەسەرخۆ شۆفێری بکەن و ماوەی نێوان ئوتومبیلەکان بپارێزن و، بەهیچ جۆرێک تێپەڕاندنی هەڵە و مەترسیدار بە ئەنجام نەگەیەنن.
ئاشكراشیدەكات، سەرجەم مەفرەزە تایبەتمەندەکانی رێگاوبانی ناوشار و دەرەوەی شار و کرێن فلات و تادانۆکانیان خراونەتە حاڵەتی ئامادەباشی بۆ خزمەتی هاوڵاتییان هەروەها میدیای هاتوچۆی سلێمانی لەڕێی ماڵپەڕ و سۆشیاڵ میدیای هاتوچۆی سلێمانی و رادیۆی ترافیک FM بە شەپۆلی 88.05 ئاگادارتان دەکات لە کاتی هەبوونی هەر حاڵەتێکی لەناکاو و مەترسیدار، هەروەها هێڵی گەرمی بەڕێوەبەرایەتییان ژمارە 188 کە 24 کاتژمێر بەردەستدەبێت.
