محەمەد شیاع سودانی سەرۆک وەزیرانی عێراق، پەیامێكی لە یادی راپەڕیندا بڵاوكردەوە و دەڵێت، “راپەڕین كۆتایی بە رژێمی دیکتاتۆری هێنا و وانەیەکە لە مەردایەتی و سەربەرزی”.
ئەمڕۆ سێشەممە محەمەد شیاع سودانی سەرۆك وەزیرانی عێراق، پەیامێکی لە ساڵیادی راپەڕیندا بە زمانەکانی کوردی، عەرەبی و ئینگلیزی بڵاوکردەوە و رایگەیاند، “دوای سێ دەیە یادی راپەڕین دەکەینەوە، کە وانەیەکە لە مەردایەتی و سەربەرزی و بەڵگەیە لەسەر دڕندایەتیی دیکتاتۆرییەت و تاوانەکانی بەرامبەر بە خەڵکی بێتاوان لە ژنان و منداڵان و بەساڵاچووان كە تەنها تاوانیان ئەوە بوو، هەڵقوڵاوی گەلێك بوون كە ستەم و زۆرداریی رەتدەكردەوە”.
سودانی جەختدەكاتەوە لەوەی راپەڕین بە چەندین گۆڕی بەكۆمەڵ كۆتاییپێهات، بەڵام بەرهەمەكەی کردنەوەی دەرگایەک بوو بۆ کۆتاییھێنان بە چارەنووسی جەلاد و تیاچوونی.
دەشڵێت، “سەری رێز و نەوازش بۆ شەهیدانی راپەڕین دادەنەوێنین و خۆشبەحاڵیان كە سەركەوتنیان بەدەستهێنا و شەهیدبوونیان پەردەی لەسەر رووی رژێمی سەركوتكاری هەڵماڵی و شكۆمەندییان بۆ خۆیان و رۆڵەكانیان بەدەستهێنا”.
سەرۆك وەزیران لە پەیامەكەیدا دووپاتیدەكاتەوە كە ئەمەکداری بۆ شەھیدانی راپەڕین، کارکردنە بۆ بونیادنانی وڵاتێک کە ھەموو نەتەوەکان و رۆڵە و نەوەی شەهیدان شانازیی پێوەبکەن و حكومەتێك دروستبكرێت كە خزمەتگوزاری و بەخششی زیاتر پێشکەشبکات و خزمەتی خەڵک بکات و پێداویستییەكانیان دابینبكات.
