رۆژنامەیەكی بەریتانی دەڵێت، شانشینی یەكگرتوو رۆژی سێشەممەی داهاتوو یاسایەكی نوێ بۆ رێگری لە كۆچكردن بۆ وڵاتەكەی لەڕێی كەناڵی ئینگلیزەوە ئاشكرادەكات.
رۆژنامەی (سەن)ی بەریتانی رایگەیاند، پەردە لەسەر یاسایەكی نوێ لادەدرێت بۆ سنووردانان بۆ ئەو كۆچبەرانەی لەڕێی بەلەمی بچوكەوە لە ئەوروپا و لەڕێی كەناڵی ئینگلیزەوە خۆیان دەگەیەننە بەریتانیا.
بەپێی یاساكە ئەو كەسانەی بە بەلەم دەگەن، داوای مافی مانەوەیان وەرناگیرێت و دەگوازرێنەوە بۆ “وڵاتی سێیەمی سەقامگیر” لە نزیكترین كاتدا.
پێشتر لەندەن بەڵێنی توندكردنی رێوشوێنەكانیدا بۆ رووبەڕووبوونەوەی ئەو كێشەیە پاش بەرزبوونەوەی ژمارەی ئەو كەسانەی ئەو رێگا مەترسیدارە دەبڕن بۆ 45 هەزار تەنها لە ساڵی رابردوودا.
ساڵی رابردوو بۆریس جۆنسۆن، سەرۆك وەزیرانی پێشووی بەریتانیا رەزامەندی نیشاندا لەسەر رەوانەكردنی دەیان هەزار كۆچبەر بۆ رواندا كە دەكەوێتە دووریی زیاتر لە شەش هەزار و 400 كیلۆمەتر.
بەڵام دادگای ئەوروپا بۆ مافەكانی مرۆڤ لە دواساتەكاندا ئەو گەشتەی هەڵوەشاندەوە كە بڕیاربوو بۆ ئەو وڵاتە ئەنجامبدرێت و بڕیارەكەی بە نایاسایی و نامرۆیی ناوبرد.
