دوێنێ چوارشەممە، سەرۆک بافڵ جەلال تاڵەبانی سەرۆکی یەکێتیی نیشتمانیی کوردستان، لە دووەم کۆڕبەندی هەولێر لەبارەی پرسە ناوخۆیی، عێراقی و نێودەوڵەتییەکانی پەیوەست بە هەرێمی کوردستان دوا.
سەرۆک بافڵ ئامادەیی حزبەکەی بۆ گفتوگۆی جدیی و چارەسەری کێشەکان دووپاتکردەوە، ئەگەر لە هەرکوێ بێت تەنانەت “ئەگەر لە فەزاش” بێت.
وتەکانی بافڵ جەلال تاڵەبانی دەنگدانەوەی گەورەی لە میدیا ناوخۆیی، عێراقی و جیهانییەکاندا هەبوو.
میدیا عێراقییەکان بە بایەخەوە دەستپێشخەرییەکانی سەرۆک بافڵ باسدەکەن چ لەسەر ئاستی عێراق و چ لەسەر ئاستی هەرێمی کوردستان و کێشەکانی نێوان یەکێتی و پارتی، هەروەها چارەسەرکردنی کێشەکانی نێوان هەرێمی کوردستان و بەغداد.
رۆژنامەی “العرب” کە لە لەندەنی پایتەختی بەریتانیا دەردەچێت لەبارەی وتەکانی بافڵ جەلال تاڵەبانییەوە دەڵێت، “دەستپێشخەرییەکانی بافڵ جەلال تاڵەبانی سەهۆڵبەندانی نێوان لایەنەکانی هەرێمی کوردستان دەتوێنێتەوە”.
