ژمارەی گیانلەدەستدان بەهۆی ئەو بومەلەرزە وێرانكەرانەی كە سەرەتای ئەم مانگە توركیا و سوریای گرتەوە 50 هەزاری تێپەڕاند.
ژمارەكە تەنها لە سوریا گەیشتە پێنج هەزار و 951 كەس، لە ئامارێكی نیمچە كۆتاییدا. لەكاتێكدا بەپێی ئاماری دەسەڵاتی بەڕێوەبردنی کارەسات و فریاگوزاریی تورکیا (ئافاد) ژمارەی گیانلەدەستدان لەو وڵاتە 44 هەزار و 374 كەسە، بەمەش كۆی قوربانیانی هەردوو وڵاتەكە بۆ 50 هەزار و 325 كەس بەرزبووەتەوە.
بومەلەرزەكان وێرانیی گەورە لە ناوچەیەكی بەرفراوانی پارێزگاكانی حەلەب (باكوور) ئیدلب (باكووری رۆژئاوا) حەمات (ناوەڕاست) و لازقیە و تەرتوس (رۆژئاوا) بەدوای خۆیدا هێنا، بەمەش دژوارییەكانی گەلی سوریای زیاتر كرد كە نزیكەی 12 ساڵە بەدەست ململانێوە دەناڵێنێت و بەهۆیەوە وڵاتەكە دابەشبووە.
6ی شوبات دوو بومەلەرزەی بەهێزی یەك لەدوای یەك لە پارێزگای مەرەش-ی توركیا روویدا و زیانی گیانی و ماددی بە چەند ناوچەیەك لە باكوور و رۆژئاوای كوردستان و توركیا و سوریا گەیاند.
