ئەمریكا، پارە بلۆككراوەكانی ئێران لە عێراق ئازاد دەكات و كاربەدەستێكی ئێران زانیاری لەو بارەیەوە دەخاتەڕوو.
بەرپرسێكی ئێرانی، ئەمڕۆ هەینی 5ی ئازار ئاشكرایكرد، ئەمریكا ڕازی بووە بە ئازادكردنی ئەو پارانەی ئێران كە لە عێراق “دەستیان بەسەردا گیراوە” و چەندین ملیار دۆلارن.
حەمید حوسەینی، ئەندامی ژووری بازرگانیی هاوبەشی ئێران و عێراق لە تویتێكدا ئاشكرایكرد، “چەند سەرچاوەیەكی باوەڕپێكراوی عێراقی دەڵێن، ئەمریكا ڕەزامەندی نیشانداوە بە ئازاكردنی ئەو پارانەی ئێران كە لە بانكی بازرگانیی عێراقدان.”
حوسەینی ڕایگەیاندووە، “ئەم ڕوداوە بەر لە جەژنی نەورۆز و مانگی ڕەمەزان ڕودەدات، بۆیە ڕێگە بۆ خەڵكی ئێران خۆشدەكات پێداویستییەكانیان دابین بكەن.”
زانیارییەكان لە دەسەڵاتدارانی ئێرانەوە باس لەوە دەكەن كە ئێران 6 ملیار دۆلار قەرزی كەڵەكەبووی لای عێراقە، زۆربەی ئەو پارانەش داهاتی كارەبا و غازی ئێرانن كە بە حكومەتی عێراقی فرۆشتوون.
ڕاپۆرتەكان باس لەوە دەكەن كە بەهۆی فشارەكانی ئەمریكاوە، عێراق نەیتوانیوە ئەو پارانە بداتەوە بە ئێران.
