بەڕێوەبەرایەتیی پۆلیسی هەولێر ئاشکرایکرد، شەش تۆمەتباریان دەستگیرکردووە کە ماددەی هۆشبەریان بەکارهێناوە و دزیشیان لە خەڵک کردووە.
بەپێی راگەیەندراوی پۆلیسی هەولێر، بەشی نەهێشتنی تاوان لە سنووری ناحیەی کەورگۆسک باندێکیان دەستگیرکردووە کە لە شەش تۆمەتبار پێکهاتبوون، دوای لێکۆڵینەوە لێیان دەرکەوتووە شەوانە لە نزیک ناحیەی کەورگۆسک لەسەر زێی گەورە، ماددەی هۆشبەریان بەکاردەهێنا و دواتر دزییان لە خەڵک دەکرد.
لە راگەیەندراوەکەدا هاتووە، لە کاتی دەستگیرکردنیاندا دەستگیراوە بەسەر کۆمەڵێک کەلوپەلی بەکارهێنانی ماددە هۆشبەرەکان و دەمانچەیەک و ئۆتۆمبێلێکدا، دانیشیان بەوەدا ناوە کە دزییان لە چوار ماڵ و سێ مارکێت کردووە.
تۆمەتبارەکان بەپێی ماددەکانی (٤٤٣) و (٤٤٦) لە یاسای سزادان و ماددە (٢١)ی هەڵگرتنی چەکی بێ مۆڵەت، ڕاگیراون بۆ لێکۆڵینەوە.
