دەستەی دەستپاکی عێراق دۆسیەیەکی گەندەڵی لە نەخۆشخانەی گشتی کەرکوک ئاشکرادەکات و دوو بەرپرسی نەخۆشخانەکەش دەستگیردەکرێن.
دەستەی دەستپاکی عێراق بڵاویکردەوە، “بە پشتبەستن بە زانیاری دروست و پشتڕاستکراوە، توانراوە دۆسیەیەکی گەندەڵی لەناو نەخۆشخانەی گشتیی کەرکوک ئاشکرابکرێت کە پەیوەندیدارە بە دابینکردنی خواردنی نەخۆشخانەکە”.
ئاماژەی بەوەش کرد، “گۆڕانکاری لە لیستی ناوی نەخۆشی نەخۆشخانەکەدا کراوە، بە جۆرێک ناوی خەیاڵی و ناوی مردووان بۆ لیستەکە زیادکراوە، ئەمەش بە مەبەستی زیادکردنی پارەی خەرجی ئامادەکردنی خواردنی نەخۆشانی نەخۆشخانەکە”.
ئاشکراشیکرد، “لە دۆسیەکەدا هەردوو بەرپرسی ئێستا و رابردووی خواردنی نەخۆشخانەکە تێوەگلاون و کارەکە بە ئاگاداری ئەوان ئەنجامدراوە، بۆیە هەردووکیان بە پێی یاسا دەستگیرکراون و لێکۆڵینەوەیان لەگەڵدا دەکرێت”.
