وەزارەتی دارایی و ئابوریی هەرێم رایدەگەیەنێت، رێكارە یاساییەكان بۆ تەملیككردنی ئەو موڵكانە بەردەوامە كە لە لایەن بازرگانان و وەبەرهێنەران لە كاتی وەرگرتنی قەرزی ئاسانكاری لە ڕێگای بانكەكانەوە وەك بارمتە دانراون و لە ساڵی 2022دا نزیكەی 52 ملیار دینار قەرزی ئاسانكاری گەڕاوەتەوە بۆ خەزێنەی گشتی.
بەپێی راگەیەندراوێكی وەزارەتی دارایی و ئابوریی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، “لەچوارچێوەی بەرنامەی چاكسازیدا و هەوڵەكانی وەزارەتی دارایی و ئابوری بۆ زیادكردنی داهات، ڕێكارە یاساییەكان بۆ تەملیككردنی ئەو موڵكانە بەردەوامە كە لە لایەن بازرگانان و وەبەرهێنەران لە كاتی وەرگرتنی قەرزی ئاسانكاری لە رێگای بانكەكانەوە وەك بارمتە دانراون”.
لە راگەیەندراوەكەدا هاتووە، “بەپێی ئاماری بەڕێوەبەرایەتیی گشتیی بانكە بازرگانییەكانی هەرێم بڕی ئەو قەرزەی لای بازرگان و وەبەرهێنەرانە 375،444،189،465 دینار بووە، بەهۆی دواكەوتنی قەرزەكەوە 658،063،820،332 دینار سوودی چۆتە سەر.”
ئاماژە بۆ ئەوەش كراوە، ” لەدوای گرتنەبەری ڕێوشوێنەكانی وەزارەتی دارایی و ئابوری بڕی 17،743،967،724 دینار بە شێوەی نەقد گەڕاوەتەوە بۆ خەزێنەی گشتیی و كۆی گشتی ئەو قەرزەی لای بازرگان و وەبەرهێنەران ماوە بڕەكەی بریتییە لە 1،015،764،042،073 دیناری عێراقی و لە رێگای بانكەكانەوە دەستكراوە بە تەملیككردن و فرۆشتنی ئەو موڵكانەی بە بارمتە دانراون و لەو چوارچێوەیەشدا بە بەهای 34،153،080،000 دینار موڵكی بە بارمتە دانراو فرۆشراون حەوت موڵكی نوێش لەسەر بانكەكانی وەزارەتی دارایی تۆماركراون.”
