راوێژكاری سەرۆك وەزیرانی عێراق، هەوڵەكانی حكومەت بۆ “گەڕاندنەوەی گەندەڵكاران و پارە دزراوەكان بۆ وڵات” ئاشكرادەكات و دەڵێت، “نووسراو بۆ وڵاتان دەنێرین”.
هیشام ركابی راوێژكاری محەمەد شیاع سودانی سەرۆك وەزیرانی عێراق لە لێدوانێكدا بۆ تۆڕی میدیایی ئێستا رایگەیاند، دۆسیەی چەندین بەرپرس و كەسی تێوەگلاو لە گەندەڵییان ئامادەكردووە و ناوەكانیانیان داوە بە ئەنجومەنی باڵای دادوەری، بۆ ئەوەی بیاننێرێت بۆ وڵاتان.
روونیكردەوە، “ئەو كەسانە هەڵاتوون بۆ دەرەوەی وڵات، ئەنجومەنی باڵای دادوەری ناوەكانیان دەدات بەو وڵاتانە و داوای رادەستكردنەوەیان دەكەین”.
ئەمڕۆ شەممە ئەنجومەنی وەزیرانی عێراق ئاشكرایكرد، دوو كەس كە تۆمەتبارن بە گەندەڵیكردن، لە عوممانەوە گەڕێندراونەتەوە بۆ عێراق.
راوێژكارەكەی سودانی لەو بارەیەوە وتی، “بە سەرپەرشتیی خوودی سەرۆك وەزیران، پرۆسەی گەڕاندنەوەی پارە براوەكانی عێراق و هێنانەوەی گەندەڵكاران بەردەوامدەبێت”.
