فەرمانگەی میدیا و زانیاری حکومەتی هەرێم لە راگەیەندراوێکدا بڵاویکردەوە، هەرێمی کوردستان خاوەن قەوارەیەکی یاسایی و دەستوورییە و بەرهەمی خوێنی هەزاران شەهید و خۆڕاگری پێشمەرگە قارەمانەکانە و هیچ دەسەڵاتێک تواناى هەڵوەشاندنەوەی هەرێمى کوردستانى نییە.
فەرمانگەی میدیا و زانیاری حکومەتی هەرێم ئەمڕۆ شەممە لە راگەیەندراوێکدا بڵاویکردەوە، “رۆژنامەی “الصباح”ی عێراقی ، نووسینکی بڵاوکردووەتەوە کە گوایا لە راپرسییەکدا “خەڵک بێهیوا بوون لە دەسەڵاتى سیاسیی هەرێم و خوازیارى گەڕانەوەن بۆ سەر بەغدا”، ئەم سەنتەر و بەناو راپرسییەی رۆژنامەکە پشتی پێبەستووە، هیچ بنەمایەکی زانستی نییە و دوورە لە راستییەوە، ئەگەر بە راستیش رۆژنامەی (الصباح ) و ئەوانەی لە پشتییەوەن ، باوەڕیان بە راپرسییە، لە 25 ی سێپتەمبەری 2017، زۆرینەی هەرە زۆری خەڵکی کوردستان، لە گەورەترین راپرسی و ریفراندۆمی جەماوەری و دەنگدانێکی ئازاددا، قسەی خۆیان کرد و دەنگیان بۆ جیابوونەوە دا، بەڵام دەسەڵاتدارانی ئەوکاتی بەغدا، بە هێرشی سەربازی و بەکارهێنانی سوپا لە دژی خەڵکی کوردستان و گەمارۆدان، وەڵامی ریفراندۆم و ڕای خەڵکیان دایەوە”.
هەر لە راگەیەندراوەکەدا هاتووە، ” خەڵکی پارێزگاکانی عێراق، خۆیان شایەدی دەدەن ، کە هەرێمی کوردستان لە رووی پێشکەوتن و ئاوەدانیی و خزمەتگوزارییەوە، بە چەندین ساڵ لە پێش ناوچەکانی دیکەی عێراقەوەیە، ئیتر چۆن خۆزگە بەوە دەخوازن و داوا دەکەن بگەڕێنەوە سەر شوێنێک کە لە هەموو بوارەکاندا وێران و کاول بووە”.
لە کۆتاییشدا ئاشکرایکرد، ” هەرێمی کوردستان ، خاوەن قەوارەیەکی یاسایی و دەستوورییە و بەرهەمی خوێنی هەزاران شەهید و خۆڕاگری پێشمەرگە قارەمانەکانە و هیچ دەسەڵاتێک تواناى هەڵوەشاندنەوەی هەرێمى کوردستانى نییە و بە نووسینی رۆژنامەیەکی مایەپووچ هەڵناوەشێتەوە کە پارەیەکی زۆری لێ خەرج دەکرێت و کەسیش هەر نازانێت ماوە یان داخراوە”.
