ئەمڕۆ لە بەیروتی پایتەختی لوبنان جارێکی دیکە خۆپیشاندانی ناڕەزایەتی دژی ئەو کۆت و رێنماییانەی بۆ وەرگرتنەوەی پارە لە بانکەکان گیراونەتە بەر دەستیانپێکردەوە و هێرشکرایە سەر لقی چەند بانکێک.
میدیاکانی لوبنان بڵاویانکردەوە، “ئەمڕۆ پێنجشەممە، بەشێک لەو هاوڵاتییانەی کە پارەیان لای بانکەکان ماوەتەوە و بەهۆی ئەو رێکارە توندانەی گیراونەتە بەر نەیانتوانیوە وەریبگرنەوە خۆپیشاندانیان لە بەیروتی پایتەخت دەستپێکرد”.
لە خۆپیشاندانەکەی ئەمڕۆدا بەشێک لە خۆپیشاندەران هێرشیانکردە سەر لایەنی کەم چوار بانک و ئاگریان تێبەردان.
ئەمە لەکاتێکدایە ماوەی دوو ساڵە بەهۆی خراپبوونی دۆخی دارایی لوبنان بەشێک لە بانکەکانی ئەو وڵاتە مایەپوچبوون و ئەو هاوڵاتییانەشی پارەیان لە بانکەکان وەرگرتووە بە شێوەیەکی ئاسایی ناتوانن وەریانبگرنەوە، بەو هۆیەوە چەندین جار حاڵەتی هێرشکردنە سەر بانکەکان تۆمارکراوە.
هاوکات رۆژ بەرۆژیش بەهای لیرەی لوبنانی بەرامبەر دۆلاری ئەمریکی دادەڕمێت و ئەمەش هێندەی دیکە هاوڵاتییانی وڵاتەکەی نیگەران کردووە.
