بەڕێوەبەری گشتیی دژەتیرۆر لەگەڵ لێپرسراوی کۆمیتەی نێونەتەوەیی خاچی سوور لە هەریمی کوردستان کۆبووەوە و جەختیان لە هەماهەنگیی نێوانیان کردەوە بۆ پاراستنی بەها و پرەنسیپەکانی مافی مرۆڤ لە چێوەی یاسا نێودەوڵەتییەکاندا.
وەهاب هەڵەبجەیی بەڕێوەبەری گشتیی دژەتیرۆر- CTG پێشوازییکرد لە ئانا هاڵفۆرد لێپرسراوی کۆمیتەی نێونەتەوەیی خاچی سوور لە هەریمی کوردستاندا و بەسمە نەزیف لێپرسراوی تیمی کۆمیتە بۆ سەردانکردنی گرتووخانەکانی هەرێمی کوردستان.
لە کۆبوونەوەیاندا ئانا هاڵفۆرد سوپاسی بەڕێوەبەرایەتیی گشتیی دژەتیرۆری کرد بۆ پێشوازیکردنیان و ئامادەییان بۆ گفتوگۆکردن لەسەر پرسە مرۆییەکان لە چوارچێوەی یاسا نێودەوڵەتییە کارپێکراوەکان و پابەند بە بنەماکانی مافی مرۆڤ بەتایبەتی بە مەبەستی بەدواداچوونی چەند کەیسێکی تایبەت.
لەلایەکی دیکەوە وەهاب هەڵەبجەیی بەڕێوەبەری گشتی دژەتیرۆر CTG -ئامادەیی تەواوی بەڕێوەبەرایەتیی گشتیی دژەتیرۆری بۆ وەفدی خاچی سووری نێودەوڵەتی دەربڕی و رایگەیاند هاوکار و هەماهەنگی تەواو دەبن لەپێناو پاراستنی بەها و پرەنسیپەکانی مافی مرۆڤ و هەر لەو چێوەیەشدا هەڵسوکەوت لەگەڵ تۆمەتباران و دەستگیرکراواندا دەکرێت و دادگاو یاساش مەرجەعن بۆ راپەڕاندنی ئەرکە یاساییەکان لە دژەتیرۆر.
