سەرۆكی یەكێتی لە بەغداد لەگەڵ ئەمینداری عەسائیب ئەهلی حەق پەرۆشیی حزبەكەی بۆ دیالۆگی نیشتمانی و بەرپرسیارانە تایبەت بە کێشەکانی پەیوەست بە هەرێم و بەغداد و گەیشتن بە چارەسەرێکی هەمیشەیی دووپاتدەكاتەوە.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد چاویکەوت بە قەیس خەزعەلی، ئەمینداری گشتیی بزوتنەوەی عەسائیب ئەھلی حەق.
لە دیدارێکدا دوایین پێشهات و گۆڕانکارییە سیاسییەکان تاوتوێکران و جەخت لە بەردەوامیی هەوڵە نیشتمانییەکان کرایەوە لەپێناو سەرخستنی بەرنامەی حکومەت و جێبەجێکردنی رێککەوتننامەی لایەنەکان لە چێوەی هاوپەیمانیی بەڕێوەبردنی دەوڵەت بە ئامانجی تێپەڕاندنی بەربەستەکان و زاڵبوون بەسەر کێشەکاندا، وەك ئەوەی لە راگەیەندراوی كۆبوونەوەكەدا هاتووە.
بافڵ جەلال تاڵەبانی پەرۆشیی یەکێتی بۆ درێژەدان بە دیالۆگی نیشتمانی و بەرپرسیارانەی نێوان لایەنەکان دووپاتکردەوە بەتایبەت کێشەکانی پەیوەست بە هەرێم و بەغداد و گەیشتن بە چارەسەرێکی هەمیشەیی و پاراستنی مافە دەستوورییەکانی هەموولایەک.
