هێزەکانی ئاسایشی گەرمیان چەکدارێکی داعشیان دەستگیرکرد کە کاری شوانکاریی دەکرد لە سنووری گەرمیان.
ئاسایشی گەرمیان دەڵێت، “دوای هەڵمەت و گەڕانی بەردەوامی تیمەکانی ئاسایشی گەرمیان بۆ بنڕکردنی تیرۆر و لەناوبردنی مۆڵگەکانیان، لە چەند رۆژی رابردوودا هێزەکانمان زانیاریی وردیان کۆکردەوە لەسەر هەبوونی چەکدارێکی داعش لە سنوورەکە کە کاری شوانکاری بووە بە ناوێکی ساختەوە، دەستبەجێ هێزەکانمان لەسەر فەرمانی دادوەری لێکۆڵینەوەی ئاسایش دەستگیریانکرد کە تۆمەتبار ناوی (س.ط.ع) تەمەن 1991ـە”.
بەپێی راگەیەندراوی بەڕێوەبەرایەتیی ئاسایشی گەرمیان، تۆمەتبارەكە پێشینەی ئەندامبوونی لە داعش هەبووە لە ساڵی 2015ـدا لە حەویجە و دوای لێکۆڵێنەوە دانی بەوەدا نا کە چەکداری داعش بووە.
ئاشكراشیكردووە كە لە ماوەی رابردوودا بە هەمانشێوە برایەکی تۆمەتبار بە تۆمەتی ئەوەی چەكداری داعش بووە، لەلایەن هێزەکانی ئاسایشی گەرمیانەوە دەستگیرکرابوو.
