وەزارەتی بازرگانی دەڵێت، “لە ماوەی دوو هەفتەدا ماسی و گۆشت و پەنیر بە نرخی پاڵپشتیكراوەوە دەخەینە بازاڕەكانەوە”.
وەزارەتی بازرگانیی عێراق ئەمڕۆ شەممە رایگەیاند، “دابەشكردنی ئارد و شیر و هێلكە و مریشك نرخی ئەو خۆراكانەی دابەزاندووە و لە ماوەی دوو هەفتەدا ماسی و گۆشت و پەنیریش دابەشدەكەین”.
لوما موسەوی بەڕێوەبەری گشتیی كۆمپانیای بازرگانیی خۆراك وتی، “ئەمڕۆ شەممە بە فەرمی ئەو هەڵمەتە رادەگەیەنین كە ماوەی دوو هەفتەیە بە مەبەستی دابەزاندنی نرخی خۆراك بەرپاكراوە”.
راشیگەیاند، خستنەبازاڕی ئارد و شیر و هێلكە و مریشك بە نرخی پاڵپشتیكراو لەلایەن حكومەتەوە، نرخی ئەو جۆرە خۆراكانەی دابەزاندووە و هاوكاربووە لە سەقامگیركردنی بازاڕ و راگرتنی هاوسەنگیی نرخەكاندا.
بەڕێوەبەری گشتیی كۆمپانیای بازرگانیی خۆراك لە وەزارەتی بازرگانی جەختیكردەوە، “لە ماوەی دوو هەفتەی داهاتوودا ماسی و گۆشت و پەنیر بە نرخی پاڵپشتیكراو دابەشدەكەین بۆ ئەوەی نرخەكانیان داببەزن”.
