ماوەی سێ رۆژە كچێك لە ماڵی خۆیان لە هەولێر چووەتە دەرەوە و بێ سۆراغە، باوكی دەڵێت، پۆلیس و دادگای ئاگاداركردووەتەوە، بەڵام بە دەنگییەوە نەهاتوون.
كچەكە ناوی (بەسمە حسێن)ە و تەمەنی 13 ساڵە، سەرلەبەیانیی رۆژی یەكشەممەی رابردوو 29ی كانونی یەكەم لە ماڵی خۆیان چووەتە دەرەوە و لەو كاتەوە بێسەروشوێنە.
كچەكە نەخۆشیی درێژخایەنی هەیە و كەسوكاری ترسیان هەیە نەگەڕانەوەی پەیوەندی بە نەخۆشییەكەیەوە هەبێت.
حسێن یوسف، باوكی كچەكە دەڵێت، لە یەكەم رۆژەوە چوەتە بنكەی پۆلیس و دواتریش دادگا، بەڵام تائێستا هێز و لایەنە پەیوەندیدارەكان بەدەمیەوە نەچوون.
ئەمەش لەكاتێكدایە ماوەی زیاتر لە هەفتەیەكە كوڕێك بە ناوی (ئەیوب ئەحمەد) كە ئەویش تەمەنی 13 ساڵە لە شاری هەولێر لە ماڵ چووەتە دەرەوە و تاكو ئێستا چارەنووسی نادیارە.
ئەحمەد سەعدوڵا باوكی ئەو تازەلاو كە بەدرێژایی ئەو ماوەیە لە هەوڵی دۆزینەوەیدایە دوێنێ رایگەیاند، “دایكی ئەیوب دۆخی زۆر خراپە و هیچ قسەیەك ناكات، داوا لایەنی پەیوەندیدار و هاوڵاتییان دەكەم لە دۆزینەوەیدا هاوكارم بن”.
