ئەنجومەنی وەزیرانی عێراق لە كۆبوونەوەی ئەمڕۆیدا ژمارەیەك بڕیاری پەسەندكرد و بەپێی راگەیەندراوێكی كۆبوونەوەكە یەكێكیان پەیوەستە بە ناردنی 400 ملیار دینارەكە بۆ هەرێم.
ئەنجومەنی وەزیرانی عێراق ئەمڕۆ كۆبوونەوەی ئاسایی هەفتانەی خۆی بە سەرۆكایەتیی محەمەد شیاع سودانی، سەرۆك وەزیران ئەنجامدا و تیایدا ژمارەیەك بڕیاری پەسەندكرد.
بڕگەی دووەمی بەرنامەی كاری كۆبوونەوەكە وەك ئەوەی نوسینگەی سەرۆك وەزیران بڵاویكردووەتەوە تایبەت بوو بڕیاردان لەسەر خەرجكردنی بڕی 400 ملیار دیناری شایستە داراییەكانی هەرێم پشتبەست بە ناوەرۆكی بەرنامەی حكومی كە لایەنە سیاسییەكان لەسەری رێككەوتوون و ئەنجومەنی وەزیران پەسەندیكردووە.
دەربارەی ناردنی 400 ملیارەكە، كە بۆ هەردوو مانگی تشرینی دووەم و كانونی یەكەمی ئەمساڵە، لە بڕیارەكەی ئەنجومەنی وەزیراندا هاتووە، پێویستە یەكلابكرێتەوە پاش تەواوكردنی وردبینیی دیوانی چاودێریی دارایی بۆ زانیارییەكانی پەیوەست بە داهاتە نەوتی و نانەوتییەكان، بە هەماهەنگی لەگەڵ دیوانی چاودێریی دارایی هەرێم، هەروەها تەواوكردنی ئەژماركردنی داهاتی نەوت لەلایەن وەزارەتی نەوت بە هەماهەنگی لەگەڵ وەزارەتی سامانە سروشتییەكانی هەرێم.
لەكاتێكی پێشتری ئەمڕۆدا نزار ئامێدی، وەزیری ژینگەی عێراق بە تۆڕی میدیایی ئێستای راگەیاند، بە هەوڵی یەكێتیی نیشتمانیی كوردستان، بەغداد 400 ملیار دینار بۆ هەرێم دەنێرێت.
وەزیرەكەی یەكێتی جەختیكردەوە، عێراق 200 ملیارەكە بۆ مانگەكانی 11 و 12ی ساڵی 2022 دەنێرێت و بەوەش كۆی ئەو پارەیەی بڕیارە رەوانەی هەرێم بكرێت 400 ملیار دینار دەبێت.
