لەبارەی دۆخی كەركوكەوە هۆشداری دەدرێت

پەرلەمانتارێكی كورد لە ڕاگەیەندراوێكدا لەبارەی ڕەوشی كەركوكەوە هۆشداری دەدات و دەڵێت، “ئەو شارە بێ كارەبایە و كۆرۆناش بەرۆكی ماڵ بە ماڵی گرتووە”.

ڕێبوار تەها، سەرۆكی لیژنەی وزەی پەرلەمانی عێراق لە ڕاگەیەندراوێكدا ئەمڕۆ شەممە 12ی كانونی یەكەم ڕایگەیاندووە، “لەم كاتەدا كە پەتای كۆرۆنا بەرۆكی هەموو پارێزگاكانی عێراقی گرتووە، حكومەتی ناوەندی بە تەواوی كەركوكی پشتگوێ خستووە”.

ئەو پەرلەمانتارە كوردە كە خۆی خەڵكی كەركوكە ئەوەشی خستوەتەڕوو، “هیچ پەرۆشییەك بە حكومەتەوە دیارنییە بۆ چارەسەری ئەو كێشانەی بەهۆی ئەو پەتایەوە هاتونەتەپێش”.

ئاماژەی بەوەشكردووە، “پارێزگای كەركوك لەئێستادا دەناڵێنێت بەدەست پچڕانە بەردەوامەكانی كارەباوە، كە ڕۆژانە 19 كاتژمێر دەبڕێت، ئەوەش كێشەی بۆ خوێندنی ئەلیكترۆنی دروستكردووە كە لەلایەن حكومەتەوە بڕیاری لەبارەوە دراوە”.

سەبارەت بە ڕەوشی كۆرۆنا لە پارێزگاكە ئەو پەرلەمانتارە كوردە ئەوەشی وتووە، “توشبووانی كۆرۆنا زۆربەیان بەهۆی كەرەنتینەوە لەماڵەوە هەوڵی وەرگرتنی چارەسەر دەدەن، بەڵام پچڕانی بەردەوامی كارەبا كێشەی بۆ دروستكردوون، ئەمەش یەكێك لە دەیان كێشە كە پارێزگای كەركوك بەدەستییانەوە دەناڵێنێت”.

“هاوڵاتییانی كەركوك متمانەیان بە حكومەتی ناوەند نەماوە بۆ چارەسەری كێشەكانیان و دابینكردنی پێداویستییەكانیان، داوا لە مستەفا كازمی سەرۆكوەزیرانی عێراق دەكەم بە ڕۆڵی خۆی هەستێت و چاودێریی بارودۆخی ئەو پارێزگایە بكات”، وەك ڕێبوار تەها ئاماژەی پێكردووە.

بابەتی پێشتر

"دروستكردنی فەوجێكی كوردیی سەربە حەشدی شەعبی دووبارەبوونەوەی جاشایەتییە"

بابەتی دواتر

سیستمی دابینكردنی ئۆكسجینی وێستگەی بۆشایی ئاسمان لەكاردەكەوێت

بابەتی پەیوەندیدار
Total
1
Share