راگەیاندنی قائیمقامیەتی سلێمانی دەڵێت، لیژنە هاوبەشەکان فێڵی غازفرۆشێکیان ئاشکراکرد كە بەهۆی فێڵکردن لە هاوڵاتییان و کەمکردنەوەی کێشی بوتڵەکان، دەستگیرا بەسەر (20) بوتڵی غاز کە بڕێکی کەم غازیان تێکراوە و بە نرخی پڕ بە هاوڵاتییان دەفرۆشرێن.
رێکان جەمال سەرۆکی لیژنە هاوبەشەکانی قائیمقامیەتی سلێمانی رایگەیاند، ئەو بوتڵانە لە دوکانی غازفرۆشیی (مەحمود) لە راپەڕین لەسەر شەقامی سەرەکیی سلێمانی دەستیان بەسەردا گیراوە.
وتیشی، “بۆ زانیاریی هاوڵاتییان هەموو بوتڵێک بە بەتاڵی (16) کیلۆیە و بە پڕی (28) کیلۆگرامە، بەڵام ئەم غازفرۆشە لە بەنزینخانە غازی کەمی تێکردووەتەوە و بوتڵەکە بە غازەکەوە (20) کیلۆگرامە، واتە لە بری (12) کیلۆگرام (4) کیلۆگرام غازی تێکردووەتەوە و بە هاوڵاتییان بە پڕ دەیفرۆشێت، ئەوەش رێگەپێنەدراوە و رێکاری یاسایی لەگەڵ خاوەنی فرۆشگەکە دەگیرێتەبەر”.
