سەرۆكی شارەوانیی سلێمانی سەردانی هەردوو نەمامگەی بەڕێوەبەرایەتیی باخچەكانی لەناو پاركی ئازادی و نەمامگەی شەماڵ كرد و سەردانەكەش بە مەبەستی زیادكردنی بەرهەمی ساڵانەی دار و دەوەن و نەمام و گوڵی جۆراو جۆر بووە.
بەپێی راگەیەندراوێكی سەرۆكایەتیی شارەوانیی سلێمانی ئەمڕۆ چوار شەممە، سەرۆكی شارەوانی سەردانی هەردوو نەمامگەی (مشتل)ی بەڕێوەبەرایەتیی باخچەكانی كرد لەناو پاركی ئازادی و نەمامگەی شەماڵی كرد كە سەردانەكە بە مەبەستی هەوڵدان بوو بۆ زیادكردنی بەرهەمی ساڵانەی دار و دەوەن و نەمام و گوڵی جۆراوجۆر و دواتر گواستنەوەیان بۆ بلوار و باخچەكانی گەڕەكەكان وەك خزمەتێك بە شاری سلێمانی خۆشەویست.
لە راگەیەندراوەكەدا هاتووە، سەرۆكی شارەوانی جەختی لە گرنگیدانی زیاتر بە نەمامگەكانی شارەوانی كردووە و ئاماژەی بۆ ئەوەش كرد، كار لەسەر داواكارییەكان دەكەین و پاڵپشت و پشتگیریی كارەكانیان دەبین لە پێناو بەرژەوەندیی گشتی و زیادكردنی ڕێژە و ڕووبەری سەوزایی.
ئاماژە بۆ ئەوەش كراوە، بەپێی وتەی لێپرسراوی نەمامگەی پاركی ئازادی؛ خۆشبەختانە داتای دوو مانگی كۆتایی ساڵی پێشوو، بە نزیكەیی 85 هەزار گوڵ و دەوەن و نەمام بووە و لە وەرزی چاندندا سوودیان لێوەردەگیرێت و كاری پێویست ئەنجامدەدەن.
