بەیانیی ئەمڕۆ یەکشەممە لە ناحیەی چوارقوڕنەی سەر بە ئیدارەی راپەڕین، ئاگر لە ماڵێکدا کەوتەوە و بەهۆیەوە ژنی ئەو ماڵە کە دووگیان بووە گیانیلەدەستدا.
لە لێدوانێکدا بۆ تۆڕی میدیایی ئێستا نەقیب عەلی قادر وتەبێژی بەرگریی شارستانیی راپەڕین رایگەیاند، لە کاتژمێر 7:50 خولەک ئاگادارکراونەتەوە لە بوونی رووداوێکی ئاگرکەوتنەوە، بەڵام ئاگرەکە لە کاتژمێر 7:00ی بەیانی کەوتبووەوە.
بەپێی وتەی بەرگریی شارستانی، ژنی ئەو ماڵە کە دووگیان بووە و بەتەنیا لە ماڵەوە بووە گیانیلەدەستداوە، هاوسەرەکەشی پێشمەرگە بووە و لە دەوام بووە.
سەبارەت بە هۆکاری ئاگرەکە وتەبێژی بەرگریی شارستانیی راپەڕین وتی، بەهۆی ئەوەی سۆپای کارەبایی ئیشی کردووە و پلاکی کارەباکە بەرگەی نەگرتووە و تواوەتەوە و ئاگرەکە دروستبووە.
