سەرۆكایەتیی هەرێمی كوردستان: هەرێمی كوردستان لەبەردەم دۆخێكی ناڕووندایە

سەرۆكایەتیی هەرێمی كوردستان راگەیەندراوێكی لەبارەی سەردانی شاندی حكومیی ئەمریكا بە سەرۆكایەتیی برێت مەكگۆرك بڵاوكردەوە و ئاشكرایدەكات، هەرێمی كوردستان لەبەردەم دۆخێكی ناڕوون و كۆمەڵێك ئاڵنگاریدایە و دەشڵێت، “ئێستا زیاتر لە هەر كاتێك پێویستمان بە یەكگرتوویی و هاوكاریی هەموو لایەنەكانە، بەتایبەت پارتی و یەكێتی”.

بەپێی راگەیەندراوێكی سەرۆكایەتیی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، سەرۆكایەتیی هەرێمی كوردستان پێشوازی لە دوا سەردانی شاندی حكومیی ئەمریكا دەكات بە سەرۆكایەتیی برێت مەكگورك، نێردەی سەرۆكی ئەمریكا بۆ كاروباری ڕۆژهەڵاتی ناوەڕاست و باكووری ئەفریقا و بە یاوەریی ئامۆس هۆكستاین، نێردەی سەرۆكایەتیی ئەمریكا بۆ ژێرخانی جیهانی و ئاسایشی وزە كرد .

لە راگەیەندراوەكەدا هاتووە، “ئێمە پابەندی و پاڵپشتیی خۆمان بۆ پەیوەندیی دوولایەنەی بەهێز و بەرهەمداری عێراق و هەرێمی كوردستان لەگەڵ ئەمریكا لەسەر بنەمای ڕێككەوتنی چوارچێوەی ستراتیژیی دووپاتدەكەینەوە و هەرێمی كوردستان لەبەردەم دۆخێكی ناڕوون و كۆمەڵێك ئاڵنگاریدایە و ئەمڕۆ، زیاتر لە هەر كاتێك، پێویستمان بە یەكگرتوویی و هاوكاریی نێوان هەموو لایەنەكان، بەتایبەتیش یەكێتیی نیشتمانیی كوردستان و پارتی دیموكراتی كوردستانە كە پێكەوە دوا ڕۆژی ئەم هەرێمەیان لە دەستدایە”.

ئاماژە بۆ ئەوەش كراوە، “داوا لە سەرجەم هێزە سیاسییەكان دەكەین كە جیاوازییەكانیان بەلاوە بنێن و بە سنگێكی فراوانەوە كێشەكانیان لە رێگای گفتوگۆ و لێكگەیشتنەوە چارەسەربكەن. ئەوەی كۆماندەكاتەوە زۆرگەورەترە لەوەی لە یەكتریمان جیادەكاتەوە و بۆ ئەوەی بتوانین سەقامگیری و یەكڕیزی جێگیربكەینەوە، بۆ ئەوەی بتوانین بەرژەوەندییەكانی هاوڵاتییانی هەرێمی كوردستان بپارێزین و پەرەیان پێبدەین، پێویستە هەموومان بە بەرپرسیارێتییەوە هەنگاوبنێین”.

هەر لە راگەیەندراوەكەی سەرۆكایەتیی هەرێمدا هاتووە، پێشوازی لە بەرەوپێشچوونی بەردەوامی چارەسەری كێشەكانی نێوان حكومەتی فیدراڵیی عێراق و حكومەتی هەرێمی كوردستان دەكەین، وێڕای سەختییەكانی ڕابردوو، ئێمە گەشبینین كە دەتوانین لەگەڵ محەمەد شیاع سودانی سەرۆك وەزیران و كابینەكەی و لە چوارچێوەی دەستووری عێراقدا، گرفتە هەڵپەسێراوەكان چارەسەربكەین.

بابەتی پێشتر

پەرلەمانتارێك: 95%ی بڕگە و ماددەكانی پڕۆژەیاسای بودجە تەواو بووە

بابەتی دواتر

بێستون حەوێز ئاسەواری گوللە بە جەستەیەوە بووە و تەرمەكەیان لە شوێنێكەوە هەڵداوەتەخوارەوە

بابەتی پەیوەندیدار
Total
0
Share