قوباد تاڵەبانی جێگری سەرۆک وەزیرانی هەرێمی کوردستان لەگەڵ برێت مەکگۆرک کۆبووەوە و کێشە ناوخۆییەکان و پەیوەندییەکانی نێوان هەرێم و بەغداد و پێگەی هەرێمی کوردستان لە ناوچەکەدا تاوتوێ کران.
لە کۆبوونەوەکەدا شاندی ئەمریکا پشتگیریی خۆیان بۆ هەرێمی کوردستان دووپاتکردەوە و جەختیانکردەوە لەسەر بەردەوامیدان بە هاوکاریکردنی هێزەکانی پێشمەرگە و چاکسازی لە وەزارتی پێشمەرگەدا.
هیوای ئەوەیان خواست کە لایەنە سیاسییەکانی هەرێمی کوردستان لەڕێی گفتوگۆ و دانووستانەوە چارەسەری کێشە ناوخۆییەکان بکەن.
هەر لە کۆبوونەوەکەدا باسی وزە و سیاسەتی نەوت و گازی هەرێمی کوردستان کرا و جێگری سەرۆک وەزیران رایگەیاند، دەبێت هەرێمی کوردستان و حکومەتی فیدراڵ پەلەبکەن لە رێککەوتن لەسەر یاسای نەوت و گاز بۆ ئەوەی کۆتایی بەو ناکۆکییانە بهێنرێت کە چەندین ساڵە هەیە.
سەبارەت بە پەیوەندییەکانی نێوان هەرێمی کوردستان و حکومەتی فیدراڵیش، قوباد تاڵەبانی ئاماژەی بەوەکرد، لەم قۆناغەدا پەیوەندییەکان لە ئاستێکی باشدان و پێویستە ئەم دەرفەتە بەکاربهێنین تا رێککەوتنێکی گشتگیر و درێژخایەن لەسەر بودجە و یاسای نەوت و گاز و هەموو ئاستەکانی دیکە بکرێت کە لە بەرژەوەندیی هەموو هاوڵاتییانی عێراق و هەرێمی کوردستان بێت.
لەمبارەیەوە وەفدی ئەمریکا پشتگیریی خۆیان بۆ بەهێزکردنی ئەو پەیوەندییانە دەربڕی و ئامادەییان نیشاندا هاوکاریی هەر دوو حکومەت بکەن بۆ ئەوەی بە رێککەوتنێکی گشتگیر بگەن کە لە خزمەتی هاوڵاتییانی کوردستان و عێراق و پاراستنی ئاسایش و سەقامگیریی ناوچەکەدا بێت.
