بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان، رێوڕەسمی یەكگرتنەوەی هەردوو كۆمەڵەی (ڕێكخستنە دێرینەكانی كوردستان) و (دەستەی داكۆكیكار لە ڕێكخستنە دێرینەكانی یەكێتی) لە هۆڵی شازاد سائیب لە بارەگای مەكتەبی سیاسی بەڕێوەچوو.
لە رێوڕەسمەكەدا ژمارەیەك لە ئەندامانی دەستەی كارگێڕی، مەكتەبی سیاسی و سەركردایەتی ئامادەبوون، سەرۆك بافڵ جەلال تاڵەبانی لە پەیامێكدا دەستخۆشی لە هەردوو كۆمەڵەكە كرد كە بە یەكگرتنەوەیان بەرەیەكی بەهێز و كاریگەرتریان بۆ داكۆكیكردن لە ماف، ژیان و گوزەرانی رێكخستنە دێرینەكان پێكهێنا و ئەمەش جێگای پێزانینە.
لە درێژەی پەیامەكەدا سەرۆك بافڵ بە گرنگییەوە لە رۆڵی زیندانیانی سیاسی و تێكۆشەرانی رێگەی خەباتی رووانی و وتی، “ئێوە كۆڵەكەیەكی بەهێز و پتەوی خەبات و شۆڕشی نوێ بوون و مێژووی ئێوە بە شانازییەوە دەنووسرێتەوە. ئێمە ماندووبوون و قوربانیدانی ئێوەمان لە بیرنەكردووە و چارەسەركردنی كێشە و گرفتەكانتان بە ئەركی خۆمان دەزانین، یەكێتیی نیشتمانیی كوردستان حزبی ئێوەیە و هەرواش دەمێنێتەوە”.
لەبارەی دۆخی هەرێم، سیاسەتی یەكێتی و كاری رێكخراوەیی، سەرۆكی یەكێتیی نیشتمانیی كوردستان ئامادەبووانی بەرچاو ڕوونكرد و رایگەیاند، “ئێمە پابەندین بەو بەڵێنەی بە خەڵكی خۆمان داوە كە خۆی لە خزمەتكردن، رووبەڕووبوونەوەی گەندەڵی و چەسپاندنی یاسادا دەبینێتەوە و لە هەوڵەكانمان بەردەوامین، بە پشتیوانی و هێزی لەبن نەهاتووی ئێوەشەوە درێژە بە سیاسەتی حەكیمانە و نیشتمانییانەی سەرۆك مام جەلال دەدەین و یەكێتی ناو یەكێتی وەك چاومان دەپارێزین”.
