زینک ڕۆڵێکی گرنگی هەبوو لە کردە زیندەییەکانی جەستەدا بەتایبەتی پرۆسەی میتابۆلیزم، هەروەها پارێزگاری لە سیستمی بەرگریی جەستە دەکات و شانە تێکچووەکان چاکدەکاتەوە.
جەستەی مرۆڤ زینک کۆناکاتەوە، ئەمەش وایکردووە کە پێویست دەکات ڕۆژانە بە ڕادەی پێویست ئەم پێکهاتەیە بخۆیت.
لێکۆڵینەوەکان ئاماژە بەوە دەکەن کە پیاوان (19 ساڵ و سەرووتر) پێویستە ڕۆژانە 11 ملیگرام زینک بخۆن، لەکاتێکدا ئافرەتانی ئەم تەمەنە پێویستیان بە 8 ملیگرامە.
بەگوێرەی ماڵپەڕی پزیشکیی “Healthline” کۆمەڵێک خۆراکی دەوڵەمەند بە زینک هەن، وەک لەم لیستەی خوارەوەدا:
گۆشت
گۆشتی سوور سەرچاوەیەکی باشی زینکە، بەو پێیەی 100 گرام گۆشتی مانگا، بۆ نموونە، 4.79 ملیگرام ئەم پێکهاتەیەی تێدایە، واتە نزیکەی 43.5%ی پشکی پێویستی بۆ پیاوان، و 59.9% بۆ ئافرەتان.
بەپێی ماڵپەڕی فود داتا سێنتراڵ، گۆشتی سوور سەرچاوەیەکی دەوڵەمەندە بە ئاسن و ڤیتامین بی و کریاتین.
چەرەسات
چەرەساتەکانی وەک گوێز، بادەم، گازۆ خۆراکێکن کە دەوڵەمەندن بە زینک، هەروەها چەوری و ڤیتامین و کانزاکانی تری تێدایە.
بەگوێرەی ماڵپەڕی پزیشکی بایۆمێد سێنتراڵ، گوێز ئەگەری تووشبوون بە کۆمەڵێک نەخۆشیی مەترسیدار کەم دەکاتەوە، وەک شێرپەنجە و دڵ.
هێلکە
هێلکە بڕێکی باشی زینکی تێدایە لەگەڵ کۆمەڵێک ڤیتامین و کانزای تر، لەوانە ڤیتامینەکانی بی و سیلینیۆم.
چۆکلەیتی ڕەش
خواردنی 100 گرام چۆکلەیتی تۆخ 3.31 ملیگرام زینک دابیندەکات، بەڵام پسپۆڕانی بواری خۆراک ئامۆژگاری دەکەن کە زیادەڕەوی نەکەن بەهۆی دەوڵەمەندی بە کالۆری و شەکر.
گوێچکە ماسی
گوێچکە ماسی سەرچاوەیەکی تەندروستە بۆ زینک و کالۆریی کەمی تێدایە، شەش گوێچکە ماسی 33 ملیگرام زینک دابیندەکات.
