ئەمڕۆ چوارشەممە 9ی كانونی یەكەم، نرخی نەوتی خاو بەرزبوونەوەیەكی تری بەخۆیەوە بینی و هەر بەرمیلێک نەوتی برێنێت بە 48 دۆلار و 97 سەنت مامەڵەی پێوەکرا.
ئەو بەرزبوونەوەیە لە نرخی نەوتی برێنت دا بریتییە لە ڕێژەی 0.13%ی بەهاکەی، هاوكاتی ئەوەش نەوتی خاوی ئەمریكا نرخەكەی بەرزبووەوە و هەر بەرمیلێکی بە 45 دۆلار و 73 مامەڵەی پێوە كرا.
لە مانگی ئازاری ئەمساڵدا و بەهۆی تەشەنەسەندنی پەتای كۆرۆنا و ئەو نیمچە پەككەوتنەی زۆربەی كەرتەكانی ئابوری لە سەرتاسەری جیهاندا گرتەوە، نرخی نەوت لە بازاڕەکانی جیهاندا بە ڕادەیەكی زۆر دابەزی و هەر بەرمیلێك لە نەوتی خاوی برێنت لە خوار 25 دۆلارەوە مامەڵەی پێوەدەکرا.
وەك هەوڵێك بۆ چارەسەركردنی ئەو قەیرانە و بەرزكردنەوەی نرخی نەوت، ڕێکخراوی وڵاتانی هەناردەکاری نەوت (ئۆپێک) ڕێككەوتنێكی لەنێوان ئەو وڵاتانەدا ئیمزاكرد بۆ کەمکردنەوەی بڕی نەوتی هەناردەکراو، بەڵام ئەو ڕێگەچارەیەش نەیتوانی كۆتایی بە قەیرانەكە بهێنێت و تا ئێستاش نرخی نەوت لە ئاستێكی نزمدا ماوەتەوە.
