بەڕێوەبەرایەتیی هاتوچۆی هەولێر، شۆفێران لە گۆڕانكارییەك ئاگاداردەكاتەوە و دەڵێت، “هیچ کەسێک تووشی سزادان نابێت”.
لە ئاگادارینامەیەكدا بەڕێوەبەرایەتیی هاتوچۆی هەولێر ئەمڕۆ چوارشەممە رایگەیاند، “سەرجەم هاوڵاتییان و شۆفێران ئاگاداردەکەینەوە لەوەی لە رۆژی پێنجشەممە رێکەوتی 2022/12/22 راییکردنی مامەڵەی هاوڵاتییان لە فەرمانگەی هاتوچۆی هەولێر بە گشت بەش و هۆبەکانییەوە رادەگیرێت”.
بەپێی ئاگادارینامەكەی هاتوچۆی هەولێر، راگرتنی دەوام تا رۆژی 2023/1/2 دەبێت و بەهۆی تەواوبوونی ساڵی ژمێریارییەوەیە و داوا لە هاوڵاتییان دەکات لەو ماوەیەدا سەردانیان نەکەن.
بەڕێوەبەرایەتیی هاتوچۆی هەولێر راشیگەیاندووە، هەر بابەتێک لەو ماوەی راگرتنەدا بەسەربچێت وەکو ساڵیانە و مۆڵەت و ماوەی تۆمارکردن، لە دوای دەستپێکردنەوەی دەوام بۆیان قەرەبوودەکرێتەوە و هیچ کەسێک تووشی سزادان نابێت.
