بەڕێوەبەری گشتیی حەج و عەمرەی هەرێم رایدەگەیەنێت، بڕیارە لە ناوەڕاستی كانوونی دووەمی ساڵی داهاتوو لە سعودیە كۆبوونەوەیەك لەبارەی فەریزەی حەجەوە ئەنجامبدرێت و دواتر بڕیار لەسەر ژمارەی حاجیان دەدرێت و دەشڵێت، “دیاریكردنی تێچووی فەریزەی حەج بەپێی شێوازی پێشكەشكردنی خزمەتگوزارییەكان و شوێنی مانەوەیان دەگۆڕدرێت”.
نیاز راغب نەقشبەندی، بەڕێوەبەری گشتیی حەج و عەمرەی هەرێمی كوردستان لە لێدوانێكدا بە تۆڕی میدیایی ئێستای راگەیاند، تا ئێستا هیچ بڕیارێك لەبارەی فەریزەی حەج نەدراوە و بڕیارە لە ناوەڕاستی كانوونی دووەمی ساڵی داهاتوو لە سعودیە كۆبوونەوەیەك لەو بارەیەوە ئەنجامبدرێت و دواتر بڕیارە لەسەر ژمارەی حاجییان بۆ فەریزەی حەج بەپێی وڵاتەكان دەدرێت.
ئاماژەی بۆ ئەوەش كرد، “هیچ بڕیارێك بۆ تێچووی فەریزەی حەج نەدراوە و ئەوەش پەیوەستە بە شێوازی پێشكەشكردنی خزمەتگوزارییەكان و دابینكردنی شوێنی حەوانەوە بۆ حاجیان كە تێچووی فەریزەی حەج لەگەڵ گەشتی عەمرە جیاوازە بە تایبەت كە ئەوان بە شێوەی كێبڕكێ لە نێوان كۆمپانیاكاندا گەشتی عەمرە ئەنجامدەدەن”.
