ئەندامێکی فراکسیۆنی یەکێتیی نیشتمانیی كوردستان لە ئەنجومەنی نوێنەران، چەند داواكارییەکی گرنگ ئاراستەی سودانی دەکات و پەیوەستن بە ئاوەدانكردنەوەی ناوچەیەكی كوردستانەوە.
لە لێدوانێكدا بۆ ئێستا، مەلا كەریم شكور ئەندامی فراکسیۆنی یەکێتیی نیشتمانیی كوردستان لە ئەنجومەنی نوێنەران رایگەیاند، سەردانی محەمەد شیاع سودانی سەرۆك وەزیرانی عێراقی كردووە و لەبارەی گرفتەكانی خورماتوو و داواكارییەكانی هاوڵاتییانەوە كۆبوونەتەوە.
ئاشكرایكرد، داوای لە سەرۆك وەزیران كردووە پڕۆژەی خزمەتگوزاریی جۆراوجۆر لە خورماتوو جێبەجێبکرێن لە بوارەكانی ئاو و بەنداو، پرد و رێگاوبان و چەندین پڕۆژەی دیكە و روونیكردەوە، دروستکردنی بەنداوی ئاوەسپی لەسەر رووباری ئاوەسپی، دانانی تۆڕی ئاوی خواردنەوە بۆ خورماتوو، لەگەڵ چاککردنەوەی پردی زەرگە و رێگای نەوجول لە سەرەكیترین داواكارییەكان بوون.
لە رێگەی تۆڕی میدیایی ئێستاوە، ئەو پەرلەمانتارەی یەكێتی لە بەغداد دڵنیایی دا بە دانیشتووانی خورماتوو كە بەردەوامدەبن لە بەدواداچوون بۆ ئەو داواكارییانە و وتی، “لەگەڵ حكومەت لەسەر هێڵ دەبین تا جێبەجێدەكرێن”.
