لە ماوەی هەشت ساڵی رابردوودا، 11 ھەزار کەس لە عێراق بێسەروشوێنبوون و لە پێنج دەیەی رابردوودا، عێراق یەكێك بووە لەو وڵاتانەی زۆرترین كەسیان تیادا رفێندراون و بێسەروشوێنبوون.
روانگەی عێراقی بۆ مافەکانی مرۆڤ ئاشكرایكرد، لە ماوەی هەشت ساڵی رابردوودا 11 ھەزار خێزانی عێراقی، رێکخراوەکەیان لە بێسەروشوێنبوونی ئەندامێکیان ئاگادارکردووەتەوە، بەشێک لەو كەسانە لەلایەن داعشەوە رفێندراون.
رێكخراوەكە پشتبەست بە راپۆرتەكانی لیژنەی نێودەوڵەتیی خاچی سوور دەڵێت، لە عێراقدا زۆرترین كەسی بێسەروشوێنبوو هەن كە بەهۆی دەیان ساڵ لە ململانێ و توندوتیژییەوە بێسەروشوێنبوون.
بەپێی راپۆرتی روانگەی عێراقی بۆ مافەکانی مرۆڤ كە ئەمڕۆ شەممە بڵاویكردەوە، بەهۆی بۆشایی ئەمنی و رووخانی حكومەتەكان و كەمتەرخەمیی دەسەڵاتەكان لە گرتنەبەری رێكار و گەڕان بەدوای بێسەروشوێنبوواندا، زۆرترین كەس لە عێراق بێسەروشوێنبوون كە بە شێوەیەكی گشتی لە بەغداد، ئەنبار، نەینەوا و بابل بوون و تا ئێستا چارەنووسیان نادیارە.
