لیژنەی لێکۆڵینەوە و سزاکانی سەر بە فیدراسیۆنی تۆپی پێی ئیسپانیا، سکاڵایەکی یانەی بەرشلۆنەی سەبارەت بە سزادانی ڕۆبێرت لیڤاندۆڤسکی ڕەتکردەوە.
ئەمڕۆ دووشەممە، فیدراسیۆنی تۆپی پێی ئیسپانیا بە فەرمی وەڵامی یانەی بەرشلۆنەی دایەوە، لە ڕاگەیاندراوێکدا جەختیان لەوە کردووەتەوە، کە سزای سڕکردنی ڕۆبێرت لیڤاندۆڤسکی بۆ سێ یاریی لەسەریەکی “لالیگا” وەک خۆی جێبەجێدەکرێت و کەم ناکرێتەوە.
لە چێوەی یارییەکانی هەفتەی 14ی “لالیگا”، لیڤاندۆڤسکی بە کارتی سوور بەرامبەر ئۆساسونا کرایە دەرەوە و بەهۆی سوکایەتیکردن بە داوەری یارییەکە سزای سێ یاری سڕکردنی بەسەردا سەپێنرا.
“لیڤا” بەهۆی سزاکەوە ناتوانێت لە یارییەکانی دوای مۆندیال بەرامبەر ئیسپانیۆل، ئەتلەتیکۆ مەدرید، ڕیاڵ بیتیس بەشداری بکات.
