لیۆن گۆرێتسکا، ئەستێرەی نێودەوڵەتیی ئەڵمانیا تاوەکو ساڵی 2026 گرێبەستی لەگەڵ بایرن میونشن نوێکردەوە.
گرێبەستەکەی گۆرێتسکا لە کۆتایی ئەم وەرزەدا بەسەردەچوو، چەندین یانەی گەورەی وەک ڕیاڵ مەدرید، پاریس سان جێرمان و مانچستەر یونایتد خوازیاربوون بێبەرامبەر بۆندی لەگەڵدا واژووبکەن، بەڵام بەپێچەوانەی بۆچوونەکانەوە، بۆندەکەی لەگەڵ یانە باڤارییەکە نوێکردەوە.
بەڕێوەبەری وەرزشیی بایرن، حەسەن ساڵحەمێدزیچ لەوبارەیەوە ڕایگەیاند، “ئێمە خۆشحاڵین کە جۆشوا کیمیش و لیۆن گۆرێتسکا لە پێکهاتەی یانەکەمان بۆ ماوەیەکی دوورودرێژ بەردەوامبەن”.
گۆرێتسکا-ی تەمەن 26 ساڵ دووانەیەکی پتەوی لەگەڵ کیمیش لەبایرن و لەگەڵ هاڤێرتز لە ئەڵمانیا پێکهێناوە، و سێ جار ناسناوی بوندس لیگا و ناسناوێکی چامپیۆنس لیگی 2020ی بەدەستهێناوە.
