كەشناسیی هەرێم بڕی بارانبارینی 24 كاتژمێری رابردووی ناوچەكانی بڵاوكردەوە و زۆرترینی لە چوارتا بووە بە 46 ملیم، هەروەك پێشبینییەكانی كەشوهەوای ئەمڕۆ و سبەی ئاشكرادەكات.
بەڕێوەبەرایەتیی گشتیی كەشناسی و بومەلەرزەزانی هەرێم بڕی بارانبارینی 24 كاتژمێری رابردووی بڵاوكردەوە و بەپێی تۆمارەكە زۆرترین باران لە چوارتا باریوە كە 46.5 ملیم بووە، بەدوای ئەویش شێخان دێت بە 42.5 ملیم و قەلادزێ بە 41 ملیم.
بارانەكە دوای ئەو شەپۆلە دێت كە لە ئێوارەی سێشەممەوە رووی لە ناوچەكانی هەرێم كرد.
سەبارەت بە كەشوهەوای ئەمڕۆش كەشناسیی هەرێم دەڵێت، ئەمڕۆ ئاسمان نیمچەهەور دەبێت لەگەڵ ئەگەری نمەبارانێکی کەمی پچرپچر لە ناوچە شاخاوییەکانی رۆژهەڵاتی هەرێم و پلەی گەرماش نزیك دەبێتەوە لە تۆمارەكانی دوێنێ.
سبەینێش ئاسمان نیمچە هەور دەبێت و پلەی گەرما نزیک دەبێتەوە لە تۆمارکراوەکانی ئەمرۆ، وەك ئەوەی كەشناسی ئاماژەی پێداوە.
