جەیک سۆلیڤان راوێژکاری ئاسایشی نیشتمانیی کۆشکی سپی رایگەیاند، کۆریای باکوور هەموو هەوڵەکانی ئەمریکای بۆ گفتوگۆکردنی دووقۆڵی سەبارەت بە چارەسەرکردنی کێشەکان رەتکردووەتەوە.
سولیڤان لە چالاکییەکدا کە لەلایەن سەنتەری لێکۆڵینەوەی ستراتیژی و نێودەوڵەتییەوە ئەنجامدراوە رایگەیاند، پیونگ یانگ بە تەواوی پەیوەندییە دڵسۆزانەکانی ئەمریکای ڕەتکردووەتەوە.
ئاماژەی بەوەشکردووە، ئەگەر کۆریای باکوور رێگەیەکی جیاواز هەڵبژێردن بۆ لێکتێگەیشتن ئەمریکا ئامادەی هەنگاوی پراکتیکییە لەپێناو سەقامگیریی زیاتر بۆ جیهان و ناوچەکە و بەرژەوەندییەکانی هەردوولا.
بەپێیدوایین لێدوانی سەرۆکی کۆریای باکوور کیم جۆنگ ئون، ئامانجی وڵاتەکەی بوون بە گەورەترین وڵاتی ئەتۆمییە لە جیهاندا و بۆ ئەو مەبەستەش چەندین پلەدار و ئەفسەری خەڵاتکرد کە بەشدارییانکردبوو لە هەڵدانی گەورەترین مووشەکی بالیستی وڵاتەکەی.
لە سەرەتای ئەمساڵەوە پیونگ یانگ 34 مووشەکی هەڵداوە، لەنێویاندا هەڵدانی مووشەکی بالیستیکی هواسون-12ی مەودای مامناوەند، کە بە ئاسمانی ژاپۆندا فڕیوە و ژمارەیەکی پێوانەیی بۆ کۆریای باکور شکاندووە، بە دووریی 4.5 هەزار کیلۆمەتر و بەرزییەکەی لە هەزار کیلۆمەتر زیاتربووە.
