ئەندامێکی ئەنجومەنی نوێنەرانی عێراق رایگەیاند، وەزارەتی دارایی و ئابووری هەرێم رەزامەندی سەرەتایی لەسەر کردنەوەی لقی بانکی رەشید لە هەرێمی کوردستان داوە.
نەرمین مەعروف ئەندامی ئەنجومەنی نوێنەرانی عێراق رایگەیاند، ” لەماوەی رابردوودا بەچەند نووسراوێک داوامان لە بانکی ناوەند و رافیدەین و وەزارەتی دارایی فیدڕاڵ کردووە بۆ دەربڕینی رەزامەندیان لەسەر لقی بانکی رافیدەین و رەشید لە هەرێم، لەم چێوەیەشدا سەبارەت بە بانکی رافیدەین نوێترین نووسراوی ئاراستەی نوێنەرایەتی حکومەتی هەرێم لە بەغدا کردووە بە مەبەستی وەرگرتنی رەزامەندی وەزارەتی دارایی و ئابوری حکومەتی هەرێم”.
ئاماژەی بەوەش کردووە، “سەبارەت بە بانکی رەشید بە پێی نووسراوێکی بانکی ناوەند لە وەڵامی چەند پرسیارێک پەیوەست بە سیاسەتی نەقدی و کەرتی بانکی، ئاماژەیان داوە بەوەی وەزارەتی دارایی و ئابوری هەرێم رەزامەندی سەرەتایی دەربڕیوە بۆ کردنەوەی لقەکانی ئەو بانکە لە شارەکانی هەرێم”.
لە دوای راپەڕینی خەڵکی هەرێمی کوردستان لە ساڵی 1991 هەردوو بانکی رافیدەین و بانکی رەشید لە هەرێمی کوردستان کشانەوە.
