منداڵێك كەوتە مەنهۆڵێكەوە و دوای هەوڵی تیمەكانی بەرگریی شارستانی رزگاركرا.
رووداوەكە ئەمڕۆ شەممە لە ناوچەی سەدری بەغداد روویداوە، منداڵێك كەوتووەتە مەنهۆڵێكی ئاوەڕۆوە و نزیكبووەتەوە لەوەی بەهۆی هەڵمژینی گازی میسانەوە بخنكێت.
بەڕێوەبەرایەتیی بەرگریی شارستانیی بەغداد دەڵێت، “منداڵەكە لە قووڵایی ئاوەڕۆكەدا بەگیرهاتبوو، پێش ئەوەی ببوورێتەوە یەكێك لە كارمەندەكان دابەزیوەتە خوارەوە و منداڵەكەی راكێشاوە و بەو شێوەیە رزگاركراوە”.
بەپێی راگەیەندراوی بەرگریی شارستانی، لەگەڵ دەرهێنانی منداڵەكەدا فریاگوزاریی سەرەتایی بۆ كراوە و هیچ زیانێكی تەندروستی و جەستەیی بەرنەكەوتووە، سەرباری ئەوە گواستراوەتەوە بۆ نەخۆشخانە بە مەبەستی ئەنجامدانی پشكنینی پزیشكی بۆ جەستەی.
