ئەنجومەنی وەزیرانی هەرێم چەند بڕیارێكی بۆ توندوتۆڵکردنی رێنمایی و لێپرسینەوە لە پێوەر و رێکارەکانی سەلامەتی دەدات، سەرەڕای ئیدانەكردنی هێرش و بۆردومانەكانیش داوایەك ئاراستەی حكومەتی ناوەند و كۆمەڵگای نێودەوڵەتی دەكات.
ئەمڕۆ ئەنجومەنی وەزیرانی هەرێمی كوردستان بەبێ ئامادەبوونی قوباد تاڵەبانی، جێگری سەرۆك وەزیران و ژمارەیەك لە وەزیرانی تیمی یەكێتی كۆبووەوە، لە بڕگەی یەكەمدا گفتوگۆ دەربارەی توندوتۆڵکردنی رێنمایی، بەدواداچوون و لێپرسینەوە لە پێوەر و رێکارەکانی سەلامەتی و مۆڵەتی پیادەکردنی پیشەکان لەپێناوی پاراستنی ژیان و سەلامەتیی هاوڵاتییان کرا.
سەرۆک وەزیران بەناوی ئەنجومەنی وەزیرانەوە، پرسە و سەرەخۆشی لە بنەماڵە و کەسوکاری قوربانییانی هەردوو رووداوەكەی سلێمانی و دهۆكی کرد و هیوای چاکبوونەوەی خێرای بۆ بریندارەکان خواست و جەختی لەوە کردەوە کە پێویستە دامودەزگا و لایەنە پەیوەندیدارەکانی حکومەت، لە زووترین کاتدا لێکۆڵینەوە لە هۆکارەکانی روودانی ئەو کارەساتانە بکەن و هەموو رێکارێکی پێویست بگرنەبەر بۆ رێگریکردن و دووبارەنەبوونەوەیان، وەك ئەوەی لە راگەیەندراوی كۆبوونەوەكەدا هاتووە.
پاشان رێبەر ئەحمەد، وەزیری ناوخۆ راپۆرتێکی بەرفراوانی لەبارەی ئەنجامی لێکۆڵینەوە و بەدواداچوون لە هەردوو رووداوەکەی سلێمانی و دهۆک خستەڕوو کە تێیدا چەندین پێشنیار و راسپاردەی پێویستی لە بارەی چارەسەرکردنی کێشەکانی تایبەت بە سیستەمی شۆڤاژ و LPGی و گرتنەبەری رێکاری جدیی و پێویست بۆ توندوتۆڵکردنی رێنمایی و لێپرسینەوە لە پێوەر و رێکارەکانی سەلامەتی و مۆڵەتی پیادەکردنی پیشەکان و دابینکردنی پێداویستی دامەزراوەکانی بەرگری شارستانیی و شارەوانی و تەندروستیی، بەتایبەتی دابینکردنی پێداویستییەکانی بەڕێوەبەرایەتییەکانی هەماهەنگيی قەیرانەکان JCC لە پارێزگا و ئیدارە سەربەخۆکانی تێدا بوو تا بەشداری کارابکەن لە بەهاناوەچوون لە کاتی هەرجۆرە رووداوێکی گەورە و کارەساتی سروشتی.
ئەنجومەنی وەزیران بەکۆی دەنگ راسپاردە و پێشنیارەکانی وەزیری ناوخۆی پەسەندکرد و وەزارەتە پەیوەندیدارەکانی راسپارد بۆ جێبەجێکردنیان.
هەر لە چوارچێوەی ئەم تەوەرە، ئەنجومەنی وەزیران لەسەر پێشنیاری دارا رەشید وەزیری پلاندانان و هەروەک لە کۆنووسی لیژنە وەزارییەکەش جەختی لەسەر کرابوو، ئەنجومەن بڕیاریدا دەستەی پێوانەسازی و کۆنترۆڵی جۆری سەر بە وەزارەتی پلاندان رابسپێرێت لەگەڵ وەزارەتە پەیوەندیدارەکان بە گوێرەی پسپۆڕی، لە خاڵە سنوورییەکان، ئەو پشکنینانە بە گوێرەی ستاندارد ئەنجامبدەن و رێگری لە هاوردەکردنی کەلوپەل و تانکی غاز بکەن کە بۆ سیستمێکی سەلامەت ناگونجێن. هەروەها دەستەی پێوانەسازیی و کۆنتڕۆڵی جۆریی چالاک بکرێت و هەموو جۆرە پێداویستییەکی بۆ دابینبکرێت، بۆ ئەوەی بتوانێت ئەرکەکانی خۆی جێبەجێ بکات و چاودێرییەکی توندی کۆمپانیاکانی کوالیتی کۆنترۆڵ سەر بە کەرتی تایبەت لە خاڵە سنوورییەکان بکات.
سەرەڕای راسپاردنی بەڕێوەبەرایەتییەکانی تایبەت بە راهێنان و مۆڵەتی پیشەیی لە وەزارەتی کار و کاروباری کۆمەڵایەتی بە هاوئاهەنگیی لەگەڵ پەیمانگەی بەرگری شارستانی و بەڕێوەبەرایەتییەکانی بەرگری شارستانی لە وەزارەتی ناوخۆ، بۆ رێکخستنی کۆرس و خولی تایبەتمەند بەم بوارە بۆ راهێنانی وەستا كرێکار و ئەو کەسانەی دەیانەوێ لە بواری دامەزراندنی سیستمی شۆڤاژ و LPG کار بکەن. هەر کەسێک بیەوێ لەم بوارەدا کاربکات، دەبێ خول ببینێت و مۆڵەتی پیشەیی بەدەستبهێنێت.
هەروەها ئەنجومەنی وەزیران بڕیاریدا بە دابینکردنی پێداویستییەکانی پشکنین بۆ وەزارەتی سامانە سروشتییەکان تا پشکنینی سامپڵی غازی شل بکەوێتە ئەستۆی بەڕێوەبەرایەتیی نەوت و کانزاکان و نوێنەرانیان لە لێژنەی پارێزگا و ئیدارە سەربەخۆکان.
لە بڕگەی دووەمی کۆبوونەوەکەدا، گفتوگۆ دەربارەی پێشێلکاریی بەردەوامی سەروەریی عێراق و ھەرێمی کوردستان کرا کە پێشێلکردنێکی ئاشکرا و زەقی یاسا و رێسا نێودەوڵەتییەکان و پەیوەندی دراوسێیانەیە.
ئەنجومەنی وەزیران، لە راگەیەندراوی كۆبوونەوەكەیدا “بە توندترین شێوە” سەرکۆنەی هێرش و بۆردومانکردنی سەر هەرێمی کوردستان دەکات و داوا لە وڵاتانی دراوسێ دەکات کە رێز لە سەروەری خاکی هەرێمی کوردستان و عێراق بگرن و پێویستە حکومەتی فیدراڵی و نەتەوە یەکگرتووەکان و کۆمەڵگەی نێودەوڵەتی بەگشتی هەڵوێستی جیددیان هەبێت و سنوورێک بۆ ئەم پێشێلکاری و هێرش و پەلامارانە دابنێن و چیتر ڕێگەنەدەن سەروەری هەرێم و عێراق پێشێل بکرێت، لە هەمانکاتدا ئەنجومەنی وەزیران، هەڵوێستی نەگۆڕی حکومەتی هەرێمی کوردستانی دووپات کردەوە کە بە هیچ شێوەیەک، رێگەی نەداوە و رێگەش نادات، ئاسایشی وڵاتانی دراوسێ لە ڕێگەی هەرێمەوە تێکبدرێت و هەموو ئەم جۆرە بانگەشانەش رەتدەکاتەوە کە لەمبارەیەوە دەکرێن، چونکە هیچ بنەمایەکیان نییە و لە راستییەوە دوورن.
بڕگەی سێیەمی کۆبوونەوەکە، تایبەت بوو بە خستنەڕووی پێشنیاری وەزارەتی کار و کاروباری کۆمەڵایەتی بۆ هەموارکردنی پەیڕەوی دایەنگەکان لە هەرێمی کوردستان، تایبەت بە مۆڵەتی دایەنگەکان، کە لە لایەن کوێستان محەمەد کاروکاروباری کۆمەڵایەتی خرایەڕوو.
ئەنجومەنی وەزیران پێشنیارەکەی وەزارەتەكەی بۆ هەموارکردنی پەیڕەوی دایەنگەکان پەسەندکرد.
