بانكی ناوەندیی عێراق، 15 ملیۆن دینار قەرز دەدات بە تووشبووانی شێرپەنجە و هەرێمی كوردستانیش دەگرێتەوە، هەوڵێكیش هەیە سوودی سەر قەرزەكە لاببرێت.
بەپێی بڕیاری بانكی ناوەندیی عێراق، رێژەی سوودی سەر قەرز بۆ تووشبووانی شێرپەنجە 2.9% دەبێت و لە ماوەی پێنج ساڵدا دەدرێتەوە.
د. نەرمین مەعروف ئەندامی فراكسیۆنی یەكێتیی نیشتمانیی كوردستان بە ئێستای راگەیاند، لەگەڵ چەندین پەرلەمانتاری دیكەدا داوای لابردنی سوودی سەر ئەو قەرزەیان كردووە كە دەدرێت بە تووشبووانی شێرپەنجە.
كۆی ئەو سوودەی لە ماوەی پێنج ساڵدا دەچێتەسەر قەرزی تەندروستی، دوو ملیۆن و 175 هەزار دینار دەبێت، د. نەرمین مەعروف دەڵێت، ئەو بڕە پارەیە زۆرە و هەوڵدەدەن سوودی سەر قەرزەكە لاببرێت، بۆ ئەو مەبەستەش نووسراوی فەرمییان پێشكەش بە بانكی ناوەندی كردووە.
