بەڕێوەبەرایەتیی هاتوچۆی سلێمانی داوا لە هاوڵاتییان دەکات ئۆتۆمبێلەکانیان دووربخەنەوە لەسەر شەقامە سەرەکییەکانی نزیک شوێنی رووداوەکە و شەقامی بازنەیی نزیک نەخۆشخانەی شار.
بەڕێوەبەرایەتیی هاتوچۆی سلێمانی لە راگەیەندراوێکدا بڵاویکردووەتەوە، ” ئاشکرایە لای هەمووان کە لە ئێستادا رووداوێکی نەخوازراو لە شاری سلێمانی روویداوە بەهۆی تەقینی تانکی غاز کە بە داخەوە زیانی گیانی تیادا روویداوە و ژمارەیەک خانوو بەهۆیەوە رووخاون، وەک بەڕێوەبەرایەتیی هاتووچۆی سلێمانی سەرجەم تیمەکانمان بەسەرپەرشتی بەڕێوەبەری هاتووچۆی سلێمانی وەک تایبەتمەندی خۆیان لە شوێنی رووداوەکەن و لەو رێگایانەی لە نزیک نەخۆشخانەی شار وە شەقامی بازنەیی مەلیک مەحمود بڵاوەیان پێکراوە”.
ئاماژەی بەوەش کرد، ” وەک هاتووچۆی سلێمانی داوا لە هاوڵاتیانی بەڕێز دەکەین کە ئۆتۆمبێلەکانیان دووربخەنەوە لەسەر شەقامە سەرەکییەکانی نزیک شوێنی رووداوەکە و لە شەقامی بازنەیی نزیک نەخۆشخانەی شار بۆ ئەوەی گرفت بۆ ئۆتۆمبێلەکانی بەرگری شارستانی و تیمە فریاگوزارییەکان و ئۆتۆمبێلەکانی ئەمبوڵانس دروستنەبێت”.
