پەرلەمانتارێكی فراكسیۆنی یەكێتی لە پەرلەمانی كوردستان رایدەگەیەنێت، ئەگەر ئەزموونی هەولێر و دهۆك ڕاپێچكردنی خەڵكبێت بۆ زیندان و كپكردنی دەنگی ئازا و ئازاد و بەرزكردنەوەی باڵەخانەی بەرپرسان و فەقیرتركردنی هەژاران بێت ئەوا ئەو ئەزموونە پیرۆز بەخۆتان بێت.
ئەمڕۆ پێنجشەممە ڕێبەر ئەحمەد وەزیری ناوخۆی هەرێم لە “كۆڕبەندی ئاشتی و ئاسایشی رۆژهەڵاتی ناوەڕاست” لە دهۆك رایگەیاند، دەتوانین ئەزموونی هەولێر و دهۆك بۆ پارێزگاكانی سلێمانی و هەڵەبجە بگوازینەوە.
لە بەرامبەردا كاروان گەزنەیی پەرلەمانتاری فراكسیۆنی یەكێتیی نیشتمانیی كوردستان لە پەرلەمانی كوردستان رایگەیاند، “ئەگەر ئەزموونی هەولێر و دهۆك، ڕاپێچكردنی خەڵكی بێت بۆ زیندان و كپكردنی دەنگی ئازا و ئازادبێت و بەرزكردنەوەی باڵەخانەی بەرپرسان و فەقیرتركردنی هەژاران بێت ئەوا ئەو ئەزموونە هەر پیرۆز بە خۆتان بێت”.
ئاماژەی بۆ ئەوەشكرد، “ئەگەر ئەزموونەكە بۆ زیادكردنی ڕێژەی بێكاری و دانەمەزراندن، دابەشكاری و داگیركاری زەوی، لافاو و نەبوونی ژێرخانی ئابوری و ناشەفافی دۆسیەی نەوت و دیار نەمانی سەدان ملیار دیناری نەوت و داهاتی ناوخۆ و غەدركردن لە پێشمەرگە و ئاسایش و هێزەكانی ناوخۆ و بێمنەتی سەرشاشە و ژوورە داخراوەكانی بەغداد بێت، ئەوا ئەو ئەزموونە هەر پیرۆز بە خۆتان بێت.
